هنري زغيب
Follow us on Facebook
Follow us on YouTube

أغانٍ ميلادية

أغانٍ ميلادية

كلمات: هنري زغيب                         ألحان أجنبية شائعة                    غناء: سلوى القطريب

 

نجمِه وليل وضوّ شموع                كل الدني عمتنطر عيدَك

نجمِه وليل وضوّ شموع

الليلِه رح يخلق يسوع

 

مغارَه سهرانِه ورعيان                  وْ عَ القشّ الصقعَه عمـتدفا

مغارَه سهرانِه ورعيان

تَ يولد طفل الزمان

 

“يا رعاةً خبرونا                       هل جرى أمرٌ غريب

خبّرونا

بشّرونا                                كيف ذا السرُّ العجيب

هللــــــــــــــــويا                      كيف ذا السرُّ العجيب”

 

دقوا جْراس دقوا جْراس               دقّوا جْراس العيد

ليل وراح

عتم وراح

رجعت الأفراح                        إيد بإيد

                                         بيوم العيد

                                         خلوا الحبّ يزيد

دقّوا جْراس ضوّوا شموع

رح يخلق يسوع

 

الدنيِه غامرها النور

لبست قميص زهور                  وتعطروا الساحات

بالورد والبخور

شوفوا القمر سهران

سارح بهالوديان                       يتنقل من وادي لْوادي

تَ يخبّر الرعيان

 

شجرَه ضوّت بكير

بليالي الحبّ الكبير                   وتلجت الطرقات

تَ يخلق طفل صغير

 

دقوا جْراس الأعياد

هيدا عيد الميلاد                      عيد الهنا والنور

يلاّ نغني يا وْلاد

 

دقوا جْراس دقوا جْراس               دقّوا جْراس العيد

ليل وراح

عتم وراح

رجعت الأفراح                        إيد بإيد

                                         بيوم العيد

                                         خلوا الحبّ يزيد

دقّوا جْراس ضوّوا شموع

رح يخلق يسوع

**********

 

وينَك يا بابا نويل

يلي ساكن نجم الليل

                       جايي وجايب هدايا كتير

                       لا تنسى إني أنا زغير

 

زيّنولي شجرةْ عيد

وقدّمولي كتاب جديد

                        أحلى هدايا بالأعياد

                       رح بتكون بِعيد الميلاد

 

يا بابا نويل يلي جايي لعنّا

توقّى عتم الليل عَ الطريق

وانْ ضيّعت البيت

رح ضوّيلَك شمعَه

وحطّا حدّ الباب عَ الطريق

 

بكرا عَ كل الابْواب

رح بتفرّق الألعاب

أوعى تْروح عَ بلادَك بكّير

تبقى فوت عَ بيت الفقير

 

وينَك يا بابا نويل

يلي ساكن نجم الليل

جايي وجايب هدايا كتير

لا تنسى إني أنا زغير